Հայաստանի առևտրային բանկերի վարկային պորտֆելի կառուցվածքը

2018 թվականի սեպտեմբեր ամսվա սկզբի դրությամբ ՀՀ առևտրային բանկերի կողմից տրամադրված վարկերի ընդհանուր ծավալը կազմել է 2975901 մլն դրամ: Տարեսկզբին այս ցուցանիշը կազմել է 2684582 մլն դրամ: Փաստացի,  ութ   ամիսների ընթացքում վարկային պորտֆելն աճել է 291319 մլն դրամով:

Վարկային պորտֆելի կազմում միայն ռեզիդենտներին տրամադրված վարկերի ծավալը կազմել է 2653773 մլն դրամ, որից տնային տնտեսություններին տրամադրված վարկերի ծավալը կազմել է 1027424 մլն դրամ, ինչը կազմում է առևտրային բանկերի վարկային պորտֆելի 35 տոկոսը:

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                  Տնային տնտեսություններին տրամադրված վարկերի կազմում ամենամեծ տեսակարար կշիռը սպառողական վարկերինն է՝ 627395 մլն դրամ,ինչը կազմում է այդ պորտֆելի շուրջ 61 տոկոսը: Ըստ ծավալի հաջորդ վարկավորման խոշոր ուղղությունը հիփոթեքային վարկերն են՝ 226526 մլն կամ տնային տնտեսություններին տրամադրված վարկային պորտֆելի շուրջ 22 տոկոսը: Տնային տնտեսություններին տրամադրված վարկերի մնացած մասը, որը կազմում է 173373 մլն դրամ կամ տնային տնտեսությունների վարկերի շուրջ 17 տոկոսը կազմել են ավտովարկերը,  ոսկու գրավադրմամբ վարկերը, օվերդրաֆտները և այլն:

Առևտրային բանկերի վարկային պորտֆելի 65 տոկոսը կամ 1948477 մլն դրամ կազմել են մասնավոր հատվածին՝ տնտեսության տարբեր ճյուղերում գործող կազմակերպություններին տրամադրված բիզնես վարկերը: Այդ վարկերի բաշխումն՝ ըստ տնտեսության ճյուղերի ունեն հետևյալ պատկերը. արդյունաբերություն՝ 543611 մլն դրամ կամ 27,4 տոկոս, առևտուր՝ 428568 մլն դրամ կամ 22 տոկոս, սպասարկման ոլորտ՝ 242406 մլն դրամ կամ 12,4 տոկոս, շինարարություն՝ 151885 մլն դրամ կամ 7,8 տոկոս, գյուղատնտեսություն՝ 143890 մլն դրամ կամ 7,4 տոկոս:

            Հայաստանի բանկային համակարգի հաճախորդների քանակը ներկայումս կազմում է շուրջ  2,45 մլն անձ, որից ֆիզիկական անձանց թիվը բացարձակ գերակշռում է՝ ավելի քան  2,37 մլն անձ, իսկ իրավաբանական անձանց թիվը կազմում է մոտ 80 հազար:

            Առևտրային բանկերում վարկային հաշիվների քանակը կազմում է 880,5 հազար, որից միայն  ֆիզիկական անձանց վարկային հաշիվների թվաքանակը կազմել է մոտ 859 հազար: Փաստացի, ստացվում է որ  ազգաբնակչության մոտ 30 տոկոսը ունի որևէ վարկային պարտվորություններ Հայաստանի առևտրային բանկերում :

Կայքում տեղ գտած հրապարակումների հեղինակային իրավունքը պատկանում է FinNews.am լրատվական-վերլուծական պորտալին։
Նյութերի մասնակի կամ ամբողջական մեջբերումը կամ օգտագործումը թույլատրվում է միայն ուղիղ հղման առկայության դեպքում։
Շնորհակալություն մեր աշխատանքը հարգելու համար։